內地第一波感染高峰結束死亡率有望低於香港

內地呢次應對疫情嘅「二十條」及「新十條」，令所有「專家」滿地搵眼鏡，至今幾乎全部收曬聲，而全國大部分省份高峰期在12月底至1月初，據民間估計，各地感染率已經達到五成或以上，咁樣講全國有七、八億人口已經感染新冠病毒，而家國內第一波感染高峰基本結束，大部分人已經有咗抗體，等於打咗加強針！由於內地已取消全民免費核酸檢測，亦取消每天嘅記者會，所以完全無曬官方嘅數據，民間只能一味靠估。

儘管omicron殺傷力較輕，但亦不能如專家所說咁輕鬆，而且後遺症因人而異，各位老友記要多注意多休息，唔好令病情惡化，否則個肺花咗就大件事。

香港新冠死亡率高於內地

其實好多人都關心咁樣開放會死幾多人，因為成日聽到唔少名人過唔到呢關，又話火化場都燒唔切，確係唔病死都俾佢嚇死。內地對死因嘅定義比較緊，如果係由基礎疾病致死嘅，即使中咗招，都會歸入主要致死嘅病因，呢點與香港嘅界定有唔同，因為香港基本按中招死於新冠而定，咁樣計算香港嘅死亡率係偏高嘅。有人做過香港及內地嘅比較，香港第五波死咗一萬多人，而內地人口係香港200倍，咁樣估計內地呢個第一波可能會死200萬人，聽落都嚇親人。

不過民間對比過香港及內地嘅情況，認為內地唔會死咁多人，佢哋估計，內地第一波感染高峰期總死亡人數估算 64.4萬人，佔總人口的萬分之四點六。如果按香港數據，高峰期之後一個月，死亡人數會增加2%，則增長到65.7萬人，接近萬分之五。到今年9月底，即疫情爆發10個月後，死亡人數會再增加27%。大概80多萬人，佔總人口約萬分之六。呢個係按總人口嘅比例計算，大概第一波超額死亡85-90萬人。爆發後10個月超額死亡110萬人左右。

內地長者接種率高於香港

香港第五波嘅死亡率超過千分之一，係世界範圍嚟講係算高嘅，香港疫苗可以揀科興或復必泰，而復必泰好過科興，點解內地嘅死亡率會低過香港呢？原因其實有兩個，第一係人口老齡化程度不同，第二係內地老年人接種率遠遠高於香港。而第二個原因更加係決定性嘅因素。據推算比較，內地80歲以上老人總人口估算死亡率為1.04%，香港為1.59%。內地60-79歲老人總人口估算死亡率為0.08%，香港為0.14%。內地總老人估算死亡率遠低於香港，接種率嘅差別係主要原因。

80歲以上老年人兩針或兩針以上的接種率，內地在疫情大規模爆發前嘅11月28日，達到65.8%，三針接種率達到了40.4%。而香港在疫情已經爆發嘅4月20日，80歲以上老年人兩針接種率只有45.6%，三針只有12.5%。60-79歲的老人接種率差別也非常大。

香港80歲以上老人，不接種疫苗總人口死亡率係2.85%，接種兩針科興係0.49%，接種兩針輝瑞係0.21%。接種三針科興係0.067%，接種三針輝瑞係0.035%。上述香港嘅數據係好值得參考嘅。

另外仲有一個數據可以看到死亡人數增加多少，就係每年總死亡人數大約1000萬人左右，2019年死亡人口998萬人，2020年997.6萬人，有所減少，2021年1014萬，而2022年嘅數據會喺2023年3月1日前後，《2022年國民經濟統計公報》會公布死亡和出生人口，到時便會有較為準確嘅數據。

正所謂：贏時間病毒減弱，打疫苗老人受惠！

 

柴灣阿叔