國慶假帳幕逼爆公園東莞古採石場景觀奇特

每逢大時大節，內地高速公路都會免費通行，全國到處去都唔駛俾錢，實在慳番好多高速費。例如國慶期間免費七天，與春節及五一假期一樣，阿叔每次都趁此良機去自駕游，舊年去福建，今年準備去海南島嘅，但由於各地都有疫情，阿叔今次只有留莞過節，避免無端端被困外地，咁就邊度都唔駛去喇！

儘管如此，亦有好多人出現抗疫疲勞，唔理咁多照常自駕游出省，阿叔有個深圳朋友便通宵被困係高速停車場，佢係9月30日下午18:00（這時入高速也可享受免費，因為出高速時已經過一號零時）從東莞塘廈出發去清遠，從大坪高速入口去到珠三角環線就一直塞車，基本上龜速行駛，間中直情郁都唔郁，10月1日凌晨4:00才到清遠，全程227公里，平均速度每小時22公里，本來唔駛兩個鐘嘅車程，結果行咗10個鐘，認真辛苦。

阿叔另一個朋友仲搞笑，十．一開部特斯拉從深圳去湖南，結果塞咗30多個鐘，仲未出廣東境，行到架車突然彈出無電警告，電量突然顯示0km，然後直情死咗火，被逼要叫拖車，但節假日要加價2000蚊，認真破費兼掃興，佢話以後點都唔會貪免費高速返老家，更唔應該開電動汽車跑長途，塞起嚟無曬辦法。

由於好多人減少外遊，東莞唔單止酒樓食肆人頭湧湧，連公園都塞滿人，唔少人直情係草地上搭起帳篷，悠哉悠哉，有名嘅東莞生態園、喜悅生態園、同沙生態公園、大嶺山、銀瓶山等森林公園到處都係遊人及露營客，唔怪得東莞咁有人氣。

阿叔睇到公園都人滿為患，於是掉頭去石排逛逛紅石山燕嶺古採石場，呢度又係另一番景象，因為呢度原來係明、清時代嘅採石場，後來荒廢，當地將此開闢為公園，古採石場係綠色掩映中，頗有南國風味。

由於紅石耐用，古時建房、鋪路喜用紅石，而東莞只有石排有紅石，所以呢個長八公里、寬半公里嘅古採石場內到處均有人工開採過嘅痕跡，可以睇到「十八房間」及「補天石」兩大景觀。紅岩經過人工開採，留下奇特形狀，而植物則頑強生長於紅岩上，令阿叔頓感有一場不期而遇，邂逅古採石場，感受紅石嘅魅力！

正所謂：滿目風情滿目春，石排新景喜踏青！

柴灣阿叔